كيف و بسهولة تحصل على أفضل أداء و استقرار من أجهزة Amlogic s905x3

عندك رسيفر بمعالج املوجيك؟ او ناوى تشترى ؟

هقولك على بعض الامور الهامة جداااا اللى هتفرق معاك فى اداء واستقرار وسلاسة الجهاز

على الهامش : لو مالكش فى الاندرويد او انت من النوع الساخط الناقم على كل شىء او من النوع اللى زانق نفسك فى المشاكل وناسي الحلول فالبوست ده مش ليك نهائيا

مفيش شك ان معالجات املوجيك هى الافضل والاقوى

و الوحيدة على الساحة حاليا من مصنع جلوبال للاندرويد و بسيرفر فوريفر

شئنا ام ابينا مش هتلاقى جهاز اندروفوريفر جديد غير بمعالج املوجيك

متقبل الفكرة.؟ توكل على الله

مش متقبلها..؟ ولا تفكر تقرب ابدا

معالجات املوجيك قوية, سريعة,مميزة

واللى متخيل ان المشكلة فى المعالجات او عيب فيها فهو غلطان

المشكلة الوحيده فى السوفت وير

بالاضافة الى ان التعامل مع المعالج ده جديد على المصنع وبيتعلموا فيه لسه

والدليل: انه عند تنزيل سوفت وير اّخر على اجهزة املوجيك الاداء والاستقرار بيختلف تماما

طيب نعمل ايه علشان ناخد افضل اداء واستقرار من الاجهزة عموما ومن الاملوجيك خصوصا؟

يلا بينا…….

هتنزل السوفت بشكل سليم ويفضل عن طريق كمبيوتر او اونلاين ابديت مش من الموبايل خالص

بعد تحديث الجهاز لازم تعمل ضبط مصنع ويفضل عن طريق ريكفرى

ماتنزلش ملف قنوات جاهز ابدا

ابحث عن اقمارك وتردداتك , احذف الراديو , احذف اى قنوات مش محتاجها, رتب قنواتك و احفظ ملفك علشان يفضل دايما معاك وترجع ليه بعد كل ضبط مصنع

معالج املوجيك معالج ذو تردد قوى وسريع جدا وده بيسبب حرارة اعلى من المعتاد بالاضافة الى ان التهوية والتبريد فى الاجهزة مش افضل حاجه

فلازم نعمل النصائح دى بشكل اكيد

لو مش فارق معاك شاشة الرسيفر الامامية خلى اضائتها على 1

لازم بشكل اكيد ترفع اى اكياس عن الجهاز وفتحات التهوية

لازم تحط الجهاز في تهوية جيدة (اهم شىء)

لازم ترفع الجهاز من 5 لـ 10 سم عن المكتب عن طريق وضعه على شىء مرتفع من الجانبين علشان تهوية الجهاز من الاسفل من مكان البورده وده اهم مكان

اوعى تحط الجهاز وراء التلفزيون انت كده بتقتله

لو عندك كولر الخاص باللاب توب حط الجهاز عليه وانسى كل شىء

لو مش هتستعمل الجهاز لفترة لن تقل عن ساعة افصله من الباور تماما

لازم تتعلم تقفل التطبيقات اللى شغالة فى الخلفية اللى انت مش محتاجها

احذف اى تطبيق على الجهاز انت مش محتاجه سواء اساسى مع الجهاز او انت منزله بنفسك

ماتنزلش اى برامج تقيلة او العاب تشتغل فى الخلفية بدون ما تاخد بالك وتعلى حرارة البروسيسور

لو اغلب المحتوى اللى بتشوفه مش 4K خلي الجودة 1080 مش 2160

اقفل ANIMATION

لو مش فارق معاك CHMAX اقفلها

لو موصل انترنت بالكابل اقفل WI-FI

ماتوصلش فى الجهاز اى شىء انت مش محتاجه زى فلاشه او هارد او ميمورى كارد و تسيبهم واصلين ليل نهار على الفاضى

لازم تتعود كل فتره انك تعمل ريستارت للجهاز علشان تعمل ريفرش للرام وتمسح الكاش وتعيد تشغيل النظام لان ده اندرويد مش جهاز عادى

ـــــــــــــــــــــــــــــــــــــــــــــــــــــــــــــــــــــــــــــــــــــ

بعد تنفيذ كل الخطوات دى تأكد انك هتاخد اداء واستقرار ممتاز من الجهاز بدون ريستارت او تهنيج او تجمد

ومع الدعم القوى والسوفتات المتتالية اداء واستقرار الجهاز بيزيد كل يوم اكتر

اى حد عنده افكار مفيدة و جديدة بنفس المعنى ياريت يشاركها معانا

اخيرا……

الحراره هى كلمة السر فى استقرار واداء كل شىء يعمل بالكهرباء

رسيفر

تكييف

سيارة

موتور

موبايل

وبناء عليه:

حرارة اعلى = اداء اسوء وعمر اقصر